<<<< >>>>

مهضوومة.. رسالة في قنينة

كما وصلتني... مهضووومة:

 

من مواطن .. فقير إلى رحمة الله... متل الجميع

هي يا شباب مو موعظة ولا خطبة، ولا دليل مستخدم ولا كتالوغ وطن، وما بدي غير رأي حدا لأنو كل واحد عندو رأي متمسك فيه بحكم تياسة العقل البشري التاريخية والمتجلية في أطنان التحذيرات على بواكيت الدخان ووجود مليارات المدخنين... هي ببساطة فشة خلق، لا بدي صلح من وراها البلد، ولا بدي احفر اسمي بحروف من ذهب، ببساطة بدي فرغ شوية طاقة. وحس بشوية راحة ضمير... فإذا كنت من القلة يللي بتحب تقرا بوطننا العربي الجميل كملها، وإذا كان مخك بيدخن وبتنفث البخار من أدانك لما تشوف كتير حروف مصفوفة فلك أن تنعتها بالعلاك المصدي وتتركها.

  

أنا حزين للغاية، ومبسوط للغاية، خايف ومتفائل... زعلان عالدم يللي عمينسفح عالطرقات من أي جهة كان، مقهور من المحتفلين بالشوارع وفيه ناس عمتموت بسوريا، مطموز من ولاد المسؤولين يللي عميطلعو يسكرو شوارع البلد بسياراتهم الفارهة بدون ادنى احساس بانو هالحركات جزء كبير من المشكلة، ممغوص من الاعلام السوري يللي لساتو بالعصر الحجري، ومن اعلام الجزيرة والعربية يللي مسمي حالو حر وكلنا منعرف وين مربوط، ومن اعلام الفيسبووك يللي بيحط شي صار وشي ماصار واحيانا شي اسخف من التصديق. وبيهلل لظهور القرضاوي ذو الخطاب الطائفي البشع . زعلان من المؤيدين يللي مقتنعين انو المتظاهرين كلهم خونة ومدسوسين، ومن المعارضين يللي مقتنعين انو كل شي مؤيد هوه خايف او جبان، من قسم المعارضين يللي الو انتماءات عائلية وابعاد اقليمية، ومن قسم الموالين يللي الو منافع ومكتسبات. خايف على 18 طائفة واعراق مختلفة بتشكل وقود لتسيير اعظم مركبة او وقود لاحراق اكبر بلد. خايف من بعبع اسمو اسرائيل، كل الناس بتعرفو منيح وزعلان من يللي بيحاولو يقزموه من المعارضين ويللي بيحولوه لاصل كل المشاكل من الموالين. وبنفس الوقت فرحان كتير، فرحان لانو لاول مرة بينحكى عن قانون الطوارئ ولو كانت دراسة، فرحان لانو الناس عمتطلع تعبر عن المها وتعبها، فرحان لاني اول مرة بتناقش مع اهلي بالسياسة وكل واحد منا برأي ومؤمن بمخاوف التاني وبآمالو. فرحان لانو الله لما خلق البشرية خلق لكم من انفسكم ازواجاً ، وهلق صار عندكم من مواطنيكم ازواجاً ، مع وضد.

 

وبالآخر انا متفائل انو هالزواج بين طرفي الشعب رح يولد وطن اكثر صحة وعافية وليس طلاقاً ابدياً .

  

ملاحظة : صرلي ساعة متردد بنشر هذه الرسالة لاني بعرف مقدار القفلة المخزون عند حضراتكن وانو رح استقبل اطنان من التعليقات الساخرة من نمرة: الكريك السياسي .. يا زلمة شو هالرومانسية، حسيتك كاساندرا . بس يللا .. لنبق هالبحصة.

 

 

أضيفت في باب:25-4-2011... > صباح الصحوة
.... إذا وجدت أن الموضوع مفيد لك، أرجو منك دعم الموقع

© جميع الحقوق محفوظة.. موقع علاء السيد